گتلي تحبني گتلك هاي جازيها
شكو غير الاحبك خاطر احـﭼيها
بكثر ما صيح بسمك بينه الشيطان
اخوتي ابيتنه متيه باساميها
احبك واحله شي گتلك الناس تگول
گلت الناس هيه الناس شعليها
ﭼـا مو عن بطر طحت بيدك خير
المحنه تروح وترد اعله راعيها
ثاري الگلب مبيوگ بوگه
والطابله مشلع عروگه
ياشدة الينكسر سوگه
من تخلي زايد حمل فوگه
ﭼـا غير كون يتوب ويـﭼـن
مصخم يالابهر دومك تحن
حته من انامن گمت اصفن
ابلايه جدم وعيوني يمشن
ياخي وزه مدري شفاگه
هنا يمشي احس الولف ساگه
والمشكله من انتلاگه
يبـﭼن هذن وتطيح ناگه
صديت لعيونه وخزرني
گال شتبي گتله ارد اغني
گال شعلي گتله انته لحني
وبلشت احط باليوجعني
ياگدار شوفي الينضم اعليك
يطلع لان مفضوح داعيك
ماتستحي من تنشد شبيك
وشبيه خايب ميت عليك
بين الاگصار مـﭼـانك ابعيد
دنيتك بصفحه من الوريد
وجروحك مبينات اجاويد
يلـﭼـمني كلما ضيمك يزيد
وكلمن يسولف بالمحنه
خيجيب ناگه ويلفي يمنه
مانحـﭼـي بس لو باوعنه
يذبح الناگه اباب اهلنه
عمي احنه وادم نشتري الشوگ
يعوزن محنه وننطي للنوگ
بس ماكو وادم بالحب تضوگ
ومامش معزب عشگ بالسوگ
الشاعر
علي مالك الموسوي
ليست هناك تعليقات:
إرسال تعليق